ചാനലുകള്‍ക്ക് ഇന്നച്ചന്‍റെ കൊട്ട്!

“ഇപ്പോ എല്ലാം ടിവിയില്‍ പറയുന്ന ഏര്‍പ്പാടാ‍ണ്. അനിയന്‍ ജ്യേഷ്ഠനോട് പറയാനുള്ളതും അച്ചന്‍ മകനോട് പറയാനുള്ളതും എല്ലാം ടിവിയില്‍ കൂടി പറയുന്ന സ്ഥിതിയാ‍ണ്“ താരസംഘടനയായ അമ്മയുടെ പ്രസിഡന്‍റും മലയാളിയുടെ പ്രിയനടനുമായ ഇന്നസെന്‍റിന്‍റേതാണ് വാക്കുകള്‍. തിലകനെതിരെ സ്വീകരിച്ച അച്ചടക്ക സമിതി തീരുമാനങ്ങള്‍ വിശദീകരിക്കവേ ആണ് ഇന്നസെന്‍റ് മലയാളത്തിലെ വാര്‍ത്താ ചാനലുകള്‍ക്ക് നര്‍മ്മത്തില്‍ കലര്‍ന്ന ഒരു കൊട്ടു നല്‍കിയത്.

കുടുംബക്കാരെ ടിവിയിലൂടെ കല്യാണത്തിനു വിളിക്കുന്ന സ്ഥിതി വരെയെത്തിയെന്ന് ഇന്നസെന്‍റ് പറഞ്ഞു. “ദേ കല്യാണത്തിന് വന്നേക്കൂട്ടോ” എന്ന് പറഞ്ഞ് ചാനലുകള്‍ക്ക് മുന്നില്‍ തനി ഇന്നച്ചന്‍ സ്റ്റൈലിലുള്ള ഡയലോഗും അദ്ദേഹം വീശി. ചാനലുകള്‍ക്ക് ഇപ്പോള്‍ സന്തോഷമാണെന്നും അമ്മ-തിലകന്‍ വിവാദം തീര്‍ന്നാ‍ല്‍ എന്തുചെയ്യുമെന്നുള്ള വിഷമത്തിലാണ് പലരുമെന്നും ഇന്നസെന്‍റ് തമാശരൂപേണ കൂട്ടിച്ചേര്‍ത്തു.

പ്രശ്നം പരിഹരിച്ചാല്‍ വിഷമിക്കേണ്ടെന്നും പകരം എന്തെങ്കിലും വിഷയങ്ങള്‍ സംഘടിപ്പിച്ചുതരാമെന്നും ചാനലുകള്‍ക്ക് വാക്കുനല്‍കാനും ഇന്നസെന്‍റ് മറന്നില്ല. വാര്‍ത്താസമ്മേളനത്തിന്‍റെ ഒടുവില്‍ “സമയം കളയാതെ നിങ്ങളിതൊക്കെ കൊണ്ട് വേവിച്ചേ” എന്ന ഡയലോഗും മാധ്യമപ്രവര്‍ത്തകരില്‍ ചിരി പടര്‍ത്തി.

കഴിഞ്ഞ ദിവസം കോഴിക്കോട് നടത്തിയ വാര്‍ത്താസമ്മേളനത്തിലും ഇന്നസെന്‍റ് തിലകന്‍ വിവാദത്തില്‍ വാര്‍ത്താചാനലുകളുടെ അതിരുകവിഞ്ഞ ഇടപെടല്‍ പരാമര്‍ശിച്ചിരുന്നു. ഇപ്പോ കാര്യങ്ങള്‍ പറയാന്‍ പേടിയാണെന്ന പരിഭവത്തോടെയായിരുന്നു ഇന്നസെന്‍റ് അന്ന് ചാനലുകള്‍ക്കെതിരെ ഒളിയമ്പ് എയ്തത്. തിലകനും അമ്മയും തമ്മിലുള്ള വിവാദം വാര്‍ത്താചാനലുകളാണ് വഷളാക്കിയതെന്ന് അമ്മയ്ക്കകത്തും അഭിപ്രായമുണ്ട്.

NB: if u r not able to read this font then pls download Malayalm Fonts from the below Link.

http://www.keralam.at/pages/Malayalam-Fonts.htm

Download Malayalam fonts..then unzip fonts and Copy fonts then paste to "C:\WINDOWS\Fonts".

Tags: Innocent, Thilakan